Pastori "generosu"
(tziu pitzulitu de Serrenti)
In su ierru de su 1948 acorrada is brabeis a domu nosta, in bia S. Brabara, unu pastori de bidda, nieddutzu (oi iant a nai "abbronzau"), marriu, bascitedhu e incurvau, de pagus fueddus e meda arrispetosu.
Arribada a sobi cabau, fadiau mortu, poniada su tallu (pegus pagus, cagallonis medas) in d'una parti de sa lolla de is carrus chi babu d'iada appesonau.
Apustis andada a domu sua, aspetau de sa mulleri e de is fillus.
A su chitzi beniada, mesu indromiscau, a mulli is brabeis.
Faciora de is setti, una borta pesau, titia su frius, fiada doveri miu (su maschitedhu de domu!) andai cun su casidhu de unu litru po mi fai donai su lati de s'afitu.
Tziu pitzulitu, aici ddi naranta a nomingiu (fortzis poita fiada pitichedhu), mi preniada su casidhu de lati, mulliada a parti una mesuredda de bufai in su momentu, totu spuma (sentza totus is esamis chi faint oi), e in prusu, fatuvatu, obiada chi provessi a mulli una brabei (ma .. non ci seu mai arrennesciu).
Meda bortas m'arregalada unu pagu de lati in prusu po mi fai su pillu (sciada ca mi praxiada tropu), aici no depia certai cun sorri mia, issa puru ammachiada.
Intzandus no cumprendia (tenia pagu prusu de ses'annus) ma, fatu a mannu, biendu chi giai sempri s'ommi e' susuncu e asuriu, de cantu fessidi generosu tziu pitzulitu mi seu arregodau, candu, poburu e abbisongiosu, cun prexei mi arregalada cussu lati in prusu chi podiada serbiri a sa famiglia sua.
A signali de custu pentzamentu, a punciotu e masseta, cun pedra de Serrenti (monti atzorcu), d'apu 'offiu arregodai setziu asuba de un'arroca e accotzau a su matzocu de ollastu, castiendi attesu, prus attesu de s'interessu e de s'abbisongiu.
E non timanta is fillus poita su nomini de su babu insoru fiada, esti e adessi sempri in s'arregordu miu "onorau", prus de s'arricu, chi esti e adessi sempri aggangau.
Deu arringratziu poita meda de cust'ommi apu imparau.
Mariu Talloru Fenza (da Serrenti)
 |
| Mariu Talloru e Tziu Pitzulitu, nel giardino-laboratorio di Pinuccio Sciola, San Sperate (CA) 1984. |
-----------------------------------------------------------------------------------------------
Su cuaddu de monti crastu
("de Anna Trutiri")
Candu fia piciochedhu, de is setti ai noi annus, su domigu a merì andà, cuntentu e prexau, cun is amigus de bixinau, Efisiu e Francescu Sanna, Luigi Talloru, Mauriliu Fenu, Manueli Pibiri, Francescu Corona e atrus, a giogai a is arrocas de monti crastu, tra cucurus domus e s'arriu de Santa Vida.
S'arroca prus manna, prus bella e prus arta fiada su cuaddu (di naranta "de Anna Trutiri"), su logu prus legiu su "tunnel", ingiassu asutta de is pedras chi a nosu poniada timoria meda poita fiada strintu, scuriosu e, secundu mei, perigulosu).
Passaiaus, una borta unu, una borta s’atru, oras e oras asuba de su cuaddu e de ingui biaiaus fintzas a monti mannu e prus attesu ancora.
Sigumenti meda bortas tirat bentu estu fotti, a nosu pariada di essi in cursa in su mari de is trigus o bobendu impari cun su storittu o is carrogas.
D-ònnia tanti su cuaddu si ndi pesada a marradas e nosu ... a terra, arrumbuendu e tzerriendu cumenti a macus.
Intzandus si castiaiaus apari e su prus atriviu atziada asuba de su cuaddu, tzerriendu a forti, e cun d'una pètia, longa e corriatza, d'arropada po du podi domai.
Chi si pariat capassu si buscada unu tzacarramanu e fueddus bonus, ma si no s'iada cumbintu po penitentzia depiada passai in su tunnel.
In benau, de asuba is arrocas, si prasciada a castiai cussu chi fadiantas is isposus sterrius in mesu a su trigu artu (chi, apustis, fiada basciu, totu crocau).
De meda tempus oramai su cuaddu e is atras arrocas non ci funti prusu, poita cun d'unu frantoiu nd'ianta fatu "ghiainu e dinai" e in cussu logu stimau una forada anti lassau.
 |
| Sa forada abarrada e in basciu s'apogiu de su frantoiu in ciumentu armau. |
 |
Non pari' berus ca in custu logu legiu e de tristura
ci fessidi su " gosu nostu " de su domigu a merì. |
 |
Su legiori de sa forada,
tumba de su "cuaddu"
e de sa "fantasia bella".
|
Mariu Talloru Fenza
(de Santa Vida de Serrenti)
 |
| cuaddu e piciochedhu in bobidu (machillotu, cuntentu e prexau) |
-------------------------------------------------------------------------------------------------
Tziu Giuanni ("peis trotus")
Dd'ia connotu giorronaderi in domu de babu.
Biviada in funtana sa bia e teniada famiglia manna.
Beniada a domu a su chitzi, faciora de is cincu.
Babu du fadiada intrai a magasinu, du cumbidada, di preniada sa butillia de su binu (chi tziu Giuanni poniada in d'unu furrungoni, allogau po cenai) e ci bessianta a su sartu a carru o a carreta.
Cancuna borta portanta a mei puru, candu no tenia iscola.
Mi praxiada a dus ascurtai arrexonendi de su tempus, de is traballus de fai o da cancuna cosa sutzedia in bidda.
Lompius a sa terra, stacanta su cuaddu da su carru e du ponianta a pasci, acapiau a una matta o trebiu.
Scarriau su strexu da su carru, si ponianta a traballai, aciungendu, fatuvatu, cancunu fueddu a s'arrexonamentu chi tenianta.
Faciora de noi oras e mesu murzanta, antzis murzaiaus, cun pani, sartitzu, ladru, obia e atrus ingaungius.
Apustis babu e tziu Giuanni torranta a traballai e deu girà cun su tirolasticu po cassai cancunu crucueu o ateradrixi.
A mesudì scapant'a prandi.
Intzandus tziu Giuanni si fadiada una passilladedda e torrada cun d'unu matzu de gicoria e de erbaviaprandi.
Setzius in d'una perda o in terra e, sterriu asuba de unu pannixedhu su pani e is ingaungius, sempri arrexonendu, papanta passu passu, bufendu cancunu tzicheddu de piriciou.
M'arragodu ca mi praxiada meda s'obia cunfetada de tziu Giuanni, mi pariada prus saboria de sa nosta.
Apustis de un'orixedda, pasiaus, torrant'a traballai fintzas a s'ora de furriai.
Faciora de is cuattru e mesu torraiaus a bidda, setzius a carru, sentz' 'e pressi, aciungendu, fatuvatu, una borta tziu Giuanni, una borta babu, cancunu fueddu.
Lompius a domu, stacanta su cuaddu e, in su mentris chi piscanta s'acua de sa funtana, deu mollia sa fa' po sa brovenda.
Apustis chi si fianta sciacuaus is manus e sa faci, babu e tziu Giuanni mucanta a magasinu e, setzius a iscannu, si cumbidanta cancuna tassixedda de binu biancu, de cannonau o de binus finis (malvasia o muscadeddu), narendu cali fessidi prus bonu e saboriu.
Deu ddus castià e ascurtà candu cun d'unu tzichedhu de binu in buca, movendu sa lingua e fadendu sonus de sciacuadura, cun d'unu suspiru de gosu nd'ingurtianta unu paghedhedhu narendu, cun meda seriedadi, ca fiada bonu, saboriu e profumau, e ca s'atru, ancora giovuneddu, siguramenti cun su tempus iada a bessì unu grandu binu e ca prus bona de cussa malvasia non d'ianta mai prusu a buffai.
Apustis tziu Giuanni, arragota sa butillia de su binu lassada a mengianu, saludada "adiosu, a crasi" e s'indi andada cun sa caminada a peis giraus a foras chi du fadiada connosci de tesu, e propriu po cussu motivu d'ianta annomingiau "tziu peis trotus".
Passaus corant'annus d'apu torrau a biri in su repartu de ortopedia de s'uspidali marinu de Casteddu, innoi deu fia radiologu.
Mi seu accostau e d'apu tocau unu bratzu "saludi tziu Giuanni cument'istaidi? Ita nci faidi innoi?".
"Labai su merisceddu, fia de diora sentza du torrai a biri, seu benniu po mi fai castiai da Professor Pusceddu, poita non arrennesciu prusu a camminai bei".
E deu "bengiada ca prima fadeus is lastra, aici no pedreus tempus apustis; setzassì innoi, ca itzerriu su tennicu".
In su mentris chi aspetaiaus d'apu domandau "o tziu Giuanni cumenti andada sa vida?".
"E .. fillu caru! M'anti agatau sa diabbeta cun su tzucuru in su sangui artu meda e m'anti postu a dieta, a regimi strintu, chi prusu strintu non podid'essi.
Su chi mi faidi arrennegai de prusu esti ca candu podia papai e tenia fami meda sa cosa de papai fia' pagu po sa poberesa, immoi chi tengiu duas pentziois e su dinai po comprai totu su chi disigu m'anti nau ca no potzu prus papai.
A mei ... mi paridi una bella frigadura!"
Biviada in funtana sa bia e teniada famiglia manna.
Beniada a domu a su chitzi, faciora de is cincu.
Babu du fadiada intrai a magasinu, du cumbidada, di preniada sa butillia de su binu (chi tziu Giuanni poniada in d'unu furrungoni, allogau po cenai) e ci bessianta a su sartu a carru o a carreta.
Cancuna borta portanta a mei puru, candu no tenia iscola.
Mi praxiada a dus ascurtai arrexonendi de su tempus, de is traballus de fai o da cancuna cosa sutzedia in bidda.
Lompius a sa terra, stacanta su cuaddu da su carru e du ponianta a pasci, acapiau a una matta o trebiu.
Scarriau su strexu da su carru, si ponianta a traballai, aciungendu, fatuvatu, cancunu fueddu a s'arrexonamentu chi tenianta.
Faciora de noi oras e mesu murzanta, antzis murzaiaus, cun pani, sartitzu, ladru, obia e atrus ingaungius.
Apustis babu e tziu Giuanni torranta a traballai e deu girà cun su tirolasticu po cassai cancunu crucueu o ateradrixi.
A mesudì scapant'a prandi.
Intzandus tziu Giuanni si fadiada una passilladedda e torrada cun d'unu matzu de gicoria e de erbaviaprandi.
Setzius in d'una perda o in terra e, sterriu asuba de unu pannixedhu su pani e is ingaungius, sempri arrexonendu, papanta passu passu, bufendu cancunu tzicheddu de piriciou.
M'arragodu ca mi praxiada meda s'obia cunfetada de tziu Giuanni, mi pariada prus saboria de sa nosta.
Apustis de un'orixedda, pasiaus, torrant'a traballai fintzas a s'ora de furriai.
Faciora de is cuattru e mesu torraiaus a bidda, setzius a carru, sentz' 'e pressi, aciungendu, fatuvatu, una borta tziu Giuanni, una borta babu, cancunu fueddu.
Lompius a domu, stacanta su cuaddu e, in su mentris chi piscanta s'acua de sa funtana, deu mollia sa fa' po sa brovenda.
Apustis chi si fianta sciacuaus is manus e sa faci, babu e tziu Giuanni mucanta a magasinu e, setzius a iscannu, si cumbidanta cancuna tassixedda de binu biancu, de cannonau o de binus finis (malvasia o muscadeddu), narendu cali fessidi prus bonu e saboriu.
Deu ddus castià e ascurtà candu cun d'unu tzichedhu de binu in buca, movendu sa lingua e fadendu sonus de sciacuadura, cun d'unu suspiru de gosu nd'ingurtianta unu paghedhedhu narendu, cun meda seriedadi, ca fiada bonu, saboriu e profumau, e ca s'atru, ancora giovuneddu, siguramenti cun su tempus iada a bessì unu grandu binu e ca prus bona de cussa malvasia non d'ianta mai prusu a buffai.
Apustis tziu Giuanni, arragota sa butillia de su binu lassada a mengianu, saludada "adiosu, a crasi" e s'indi andada cun sa caminada a peis giraus a foras chi du fadiada connosci de tesu, e propriu po cussu motivu d'ianta annomingiau "tziu peis trotus".
Passaus corant'annus d'apu torrau a biri in su repartu de ortopedia de s'uspidali marinu de Casteddu, innoi deu fia radiologu.
Mi seu accostau e d'apu tocau unu bratzu "saludi tziu Giuanni cument'istaidi? Ita nci faidi innoi?".
"Labai su merisceddu, fia de diora sentza du torrai a biri, seu benniu po mi fai castiai da Professor Pusceddu, poita non arrennesciu prusu a camminai bei".
E deu "bengiada ca prima fadeus is lastra, aici no pedreus tempus apustis; setzassì innoi, ca itzerriu su tennicu".
In su mentris chi aspetaiaus d'apu domandau "o tziu Giuanni cumenti andada sa vida?".
"E .. fillu caru! M'anti agatau sa diabbeta cun su tzucuru in su sangui artu meda e m'anti postu a dieta, a regimi strintu, chi prusu strintu non podid'essi.
Su chi mi faidi arrennegai de prusu esti ca candu podia papai e tenia fami meda sa cosa de papai fia' pagu po sa poberesa, immoi chi tengiu duas pentziois e su dinai po comprai totu su chi disigu m'anti nau ca no potzu prus papai.
A mei ... mi paridi una bella frigadura!"
Mariu Talloru Fenza
(da Serrenti)
 |
| M.T. ..... arendu a cuaddu |
